| Home |
| About UniVerse |
| Poets by Nation |
| Poetry + New Media |
| Support UniVerse |
|
Dadeni – detholiad Mae fy stori’n hen ddarllenydd, a gwir ei geiriau’n dragywyd, ’di bod o hyd – ond bob dydd yn fy neall wyf newydd ... Tybed?! Ni fentraf gredu er bod lleisiau’r greddfau’n gry, amau yr hyn roed imi a’r wyrth hardd drodd fy nghroth i yn amlen; eto teimlaf chwarae rhwydd iâr fach yr haf, glöyn ewn tu mewn i mi rywsut yn troi a throsi’n friw afrwydd, yn wefr hyfryd yn fy neffro’n gyffro i gyd – ac o wrando ei gryndod ynof fi, mi wn ei fod. Fy hanes yw dy hanes di, un cylch Yn cau a’i ddolenni’n Ddi-dor, un yw ein stori, A hon sy’n ein huno ni. D’eni heno yw’n nadeni innau I stori gariad ac ystyr geiriau Fel ‘mam’ a ‘dad’ tu hwnt i ’mhrofiadau, A bywyd eilwaith mewn byd o olau. Yn yr heddiw llawn lliwiau, ar unwaith Af ar y daith i’th yfory dithau. Curaf yn eiddgar – mae drysau ’nghariad Yn dal i agor yng nglas dy lygad. Rwy’n newydd sbon, a thi yw’r esboniad Yn magu miri – dyma gymeriad! Watarwr si_r dy siarad, dy un wên Yw chwarae’r awen, yw’r ail-ddechreuad. Ond heno’n dy wely tan dawelwch Na all ein twyllo, yn y tywyllwch Un haenen oer o ofn yw ’nhynerwch, Gwewyr â’i ystyr tu hwnt i dristwch – Oer ddwylo ar eiddilwch fy mabi, A minnau’n sylwi ar dwymyn salwch. Dere’r un bach, mae’r machlud Yn bwrw’i aur, ac mae’n bryd Cloi corlan dy deganau A hi’r nos oer yn nesau. Dere i wrando’r stori Am y wawr, a gad i mi Mewn nyth twt, am unwaith ’to, Dy ddal. Estyn dy ddwylo Bach gwyn amdanaf Cyn llithro heno i’th haf. Dere, fe ddaw’r bore bach Â’i Frenin a’i gyfrinach. Cwsg, cwsg fy nhywysog gwyn, Darfod mae’r dydd diderfyn. Mae fy neges a’i hanes hi yn hen, y mae’n h_n na’r stori ddistaw hon: dy ddewis di dy hunan yw’r dadeni. |
|
